Patay ang tulo ka tawo, lakip ang isa ka 3-anyos nga bata, samtang isa pa ang padayon nga
gitambalan sa ospital human sa grabeng aksidente sa dalan nga nahitabo alas 2:40 sa hapon
niadtong Hulyo 27 sa Sayre Highway, Purok 2B, Panadtalan, Maramag, Bukidnon.

Base sa inisyal nga imbestigasyon sa Maramag Municipal Police Station, nagsubay sa samang
direksyon ang isa ka Honda XRM nga gimaneho sa 33-anyos nga lalaki uban sa iyang tres anyos
nga angkas, ug isa ka Toyota Avanza nga gimaneho sa 67-anyos nga lalaki uban sa duha ka
pasahero. Sa dihang moliko na unta patuo ang motorsiklo ug naka-on ang signal light,
nabanggaan kini sa luyo sa Avanza nga gipasanginlang kusog ang dagan. Tungod sa impact,
nalagpot og mga 40 metros ang motorsiklo ug ang nagsakay niini, samtang ang Avanza
misimang sa dalan, mibangga sa mga lubi, mituyok pa ug miigo sa konkretong barrier sa daplin
sa karsada.
Gidali og tabang sa Maramag Rescue Team ang mga biktima ngadto sa Bukidnon Provincial
Hospital sa Maramag. Apan gideklarang dead on arrival ang drayber sa motorsiklo, ang tres
anyos niyang angkas, ug isa sa mga pasahero sa Avanza. Ang isa pa ka pasahero padayon nga
giatiman sa ospital. Ang drayber sa Avanza nga mibiya sa lugar mitahan sa Don Carlos
Municipal Police Station ug gitugyan dayon sa Maramag MPS alang sa hustong disposisyon.
(melbmadera)