MALAYBALAY CITY, Bukidnon — Gipasabot ni Atty. Evelyn R. Ramos, deputy executive
director sa Employee’s Compensation Commission (ECC), nga ang paghikog o suicide
kasagarang dili sakop sa mga benepisyo ubos sa Employee’s Compensation Program.

Gipahayag ni Ramos ang maong pagpasabot atol sa ECC advocacy seminar ug consultation
alang sa mga partisipante gikan sa public sector nga gipahigayon sa Loiza’s Pavilion sa
Casisang, Malaybalay City, Bukidnon, niadtong Sept. 23, 2026.
Gibase ni Ramos ang iyang pagpasabot sa isa ka desisyon sa Supreme Court nga nag-reverse sa
una nga desisyon sa ECC bahin sa kaso sa isa ka factory worker nga naghikog human sa
insidente nga may kalabutan sa iyang trabaho.
Matud niya, naigo sa makina ang ulo sa maong trabahante samtang nagtrabaho. Human sa
insidente, gipailalom siya sa rehabilitation ug gihatagan og clearance nga makabalik sa trabaho.
Apan, sumala kang Ramos, misamot ang epekto sa maong insidente sa mental nga kahimtang sa
trabahante ug misangpot sa iyang paghikog.
Gikonsiderar sa korte nga adunay kalambigitan ang iyang paghikog sa insidenteng nahitabo
samtang nagtrabaho siya. Tungod niini, matud ni Ramos, dili awtomatikong isalikway sa ECC
ang mga kaso sa suicide, apan susihon ang mga sirkumstansya aron matino kung adunay
direktang kalambigitan sa trabaho.
Giklaro usab sa ECC nga dili tanang sakit awtomatikong sakop sa Employee’s Compensation
Program. Apan kung ang sakit wala gilakip sa listahan sa mga compensable occupational
diseases, mahimo gihapon kini nga maangkon ubos sa Increased Risk Theory, basta adunay
igong ebidensya nga nagpakita nga ang sakit o injury adunay kalambigitan sa trabaho.
Alang sa mga trabahante sa public sector, gipatin-aw sa ECC nga ang mga benepisyo sama sa
sickness, disability, medical, carer’s allowance, ug death and funeral benefits mahimong makuha
pinaagi sa Government Service Insurance System (GSIS), depende sa eligibility ug
sirkumstansya sa kaso.
Samtang, matud sa ECC, ang benepisyo nga direktang mahatag niini mahimong maglakip sa
rehabilitation services ubos sa Employee’s Compensation Program. (Sean G.
Sulugan/Contributor)