VALENCIA CITY, Bukidnon — Kapin sa 100 ka mga negosyante ug representante gikan sa
retail ug service sectors ang mitambong sa orientation sa Department of Trade and Industry
(DTI)-Bukidnon kabahin sa online application alang sa Sales Promotion Permits ug Service and
Repair Enterprise accreditation pinaagi sa DTI-iRegis.

Gipahigayon ang maong orientation atol sa Kapehan sa Valencia Chamber niadtong Sept. 16,
2026, sa Carmen’s Hall, NVM New Farmers’ Market, Valencia City.
Gitumong sa kalihokan nga matabangan ang mga negosyante nga masabtan ang proseso sa
online application, lakip ang mga kinahanglanon ug regulatory requirements nga kinahanglang
tumanon alang sa pagkuha sa maong mga permit ug accreditation.
Atol sa orientation, gihatagan usab og higayon ang mga partisipante nga makapangutana ug
makakuha og klarong impormasyon kabahin sa mga lakang sa aplikasyon, aron malikayan ang
kalibog ug pagkalangan sa pagproseso sa ilang mga dokumento.
Gipasiugda sa DTI nga ang pagsunod sa mga regulatory requirements importante aron masiguro
nga ang mga negosyo naglihok subay sa mga lagda ug naghatag og hustong serbisyo sa mga
konsumante.
Gipakita usab sa kalihokan ang pagpalig-on sa pakigtambayayong tali sa DTI-Bukidnon ug
Valencia City Chamber of Commerce and Industry, ilabi na sa pagdasig sa business compliance,
pagpalambo sa serbisyo alang sa mga negosyante ug pagpanalipod sa katungod sa mga
konsumante.
Pinaagi sa mga orientation sama niini, gilauman nga mas mapadali ug mapasayon ang pag-access
sa mga negosyante sa government regulatory services, samtang mapalambo ang isa ka mas
responsable ug consumer-friendly nga business environment sa Valencia City. (melbmadera)