Nagbangotan karon ang mga residente sa munisipyo sa Quezon, Bukidnon human mipanaw ang
kanhi mayor niini nga si Gregorio Lloren Gue niadtong Agosto 27, 2026 sa Manila.

Sumala sa kasayoran, si Gue kinsa giilang Datu Makapukaw sa tribung Manobo sa lungsod,
namatay tungod sa sakit sa kasingkasing.
Nagsilbi siyang mayor sulod sa 18 ka tuig, diin iyang natampo ang nagkalain-laing proyekto
alang sa kalamboan sa Quezon, lakip na ang bag-ong municipal hall ug ang pagkaseguro sa 37
ka ektarya nga yuta alang sa paggamit sa lokal nga panggamhanan.
Gidala ang iyang patayng lawas ngadto sa Quezon kaniadtong Agosto 31.
Ang haya gihimo sa Quezon gikan sa pag-abot hangtod Septiyembre 2, ug ipadayon sa Cagayan
de Oro City gikan Septiyembre 3 hangtod 5.
Gikatakda usab ang iyang paglubong sa Septiyembre 6. (melbmadera)

38-anyos nga lalaki nakit-ang patay sa sapa sa Valencia
Nakit-ang patay ang isa ka 38-anyos nga lalaki nga gituohang nakuryente samtang nangisda
gamit ang portable electro-fishing device sa Purok 3, Barangay Vintar, Valencia City, Bukidnon
niadtong Agosto 29, 2026.
Sumala sa report sa Valencia City Police Station, nadawat sa kapulisan ang impormasyon alas-
12:15 sa udto gikan sa kanhing barangay kagawad sa Vintar bahin sa isa ka lawas sa tawo nga
nakit-ang nalubog sa sapa.
Dihang miabot ang mga pulis sa lugar, ilang nakit-an ang biktima nga walay lihok ug nag-
atubang paubos samtang nalubog sa sapa. Anaa usab sa iyang likod ang portable electro-fishing
device.
Base sa inisyal nga imbestigasyon, misulti ang biktima sa iyang asawa alas-7 sa buntag sa maong
adlaw nga mangisda siya gamit ang electro-fishing device sa maong lugar.
Sumala usab sa mga menor de edad nga unang nakadiskubre sa insidente, nakatapad pa sa lawas
sa biktima ang maong fishing device dihang ilang nakita kini.
Gituohang posible nga nakuryente ang biktima pinaagi sa iyang gigamit nga fishing device,
hinungdan nga nawadan siya og panimuot ug sa ulahi nalunod sa sapa.
Wala usab makit-i sa inisyal nga pagsusi ang bisan unsang timailhan sa foul play o samad sa
lawas sa biktima. (melbmadera)