MALAYBALAY CITY, Bukidnon — Gi-inagurar ang rehabilitado ug gipauswag nga City Trial
Court Building sa Malaybalay City nga nahimutang sulod sa compound sa kanhi city hall sa
Barangay 1 pinaagi sa pondo nga ₱10.6 milyon gikan sa City Government.

Ang proyekto isa sa mga inisyatibo ni Mayor Jay Warren R. Pabillaran uban sa suporta sa
Sangguniang Panlungsod, isip pagpalig-on sa imprastraktura sa hudikatura ug paghatag og mas
maayong pasilidad alang sa mga huwes ug court personnel.
Matod sa mayor, ang pagpaayo sa korte dili lamang pagpalambo sa isa ka government facility,
kondili isa usab ka pamaagi sa pagpakita og pagpasalamat sa mga huwes ug kawani sa korte nga
adlaw-adlaw nagtrabaho aron mapadayon ang hustisya, masulbad ang mga panaglalis, ug
mapatuman ang balaod.
Gipasiugda usab ni Pabillaran nga importante ang pagsalig sa katawhan sa justice system aron
mapalig-on ang demokrasya ug ang pagmando sa balaod.
Ang proyekto adunay budget appropriation nga ₱14,436,506.52, apan ang aktuwal nga gasto
mikabat lamang sa ₱10,682,985.61, nga nakahatag og ₱3,753,520.91 nga savings sa city
government.
Gilauman nga ang gipauswag nga pasilidad makatampo sa mas hapsay nga pagdumala sa mga
kaso ug mas maayong serbisyo sa publiko, ilabina sa mga molihok ug manginahanglan sa
serbisyo sa korte.
Pinaagi sa maong proyekto, gipakita sa lokal nga panggamhanan ang kahinungdanon sa
pagpalig-on sa mga institusyon nga nagpatuman sa hustisya ug nagpanalipod sa katungod sa
matag lungsoranon. (melbmadera)