VALENCIA CITY, Bukidnon — Misalmot sa pagpanalipod ug pag-amuma sa kinaiyahan ang
mga miyembro sa Kapisanan ng mga Brodkaster ng Pilipinas (KBP) Bukidnon Chapter pinaagi
sa pagpahigayon og tree-planting activity daplin sa Pulangi River sa Valencia City

Niadtong Sept. 17, 2026, nananum og mga kahoy ang mga miyembro sa KBP Bukidnon sa bahin
sa Pantad, Purok 11, Barangay Poblacion, Valencia City, isip kabahin sa ilang padayong
environmental advocacy.
Sumala kang KBP Bukidnon Chairman Armando Benabaye, gitawag og “BroadcasTreeing” ang
maong kalihokan, isa ka tinuig nga programa nga nagtumong sa pagdasig sa mga brodkaster ug
komunidad nga mahimong kabahin sa pagpanalipod sa kinaiyahan.

Gibanabana nga 1,000 ka seedlings sa Talisay Gubat ug Narra ang gitanom sa maong lugar.
Gilauman nga sa pagdako sa mga kahoy, makatampo kini sa pagpalig-on sa mga daplin sa suba,
pagpreserbar sa natural nga kahimtang sa palibot ug makatabang sa pagpakunhod sa epekto sa
pagbaha sa mga komunidad nga duol sa Pulangi River.
Dili lamang pagtanom og kahoy ang tumong sa BroadcasTreeing, kondili ang paggamit usab sa
gahum sa brodkasting sa paghatag og kahibalo ug pagdasig sa publiko sa pag-apil sa mga
kalihokan alang sa pagpanalipod sa kinaiyahan.
Pinaagi sa maong inisyatibo, gipakita sa KBP Bukidnon nga ang papel sa media dili lamang
kutob sa paghatod og balita ug impormasyon, apan mahimo usab nga instrumento sa pagpalambo
sa environmental awareness ug pagpalihok sa komunidad alang sa mas malungtarong kaugmaon.
Ang KBP-Bukidnon Chapter gilangkuban sa 13 ka estasyon sa radyo nga nagserbisyo sa
nagkadaiyang mga komunidad sa probinsya. (melbmadera)