Gipaubsan na ang age requirement sa Senior Citizens sa Valencia City, Bukidnon aron makadawat og P200 matag bulan nga allowance nga ipagawas matag quarter o P600 matag tulo ka bulan

Sumala sa Facebook post sa City Government of Valencia, ubos sa Ordinance No. 17-2025 nga nag-amenda sa Ordinance No. 44-2011, gipa-ubsan ang age requirement gikan 70 anyos ngadto 60 anyos.

Sugod sa Enero 2026, ang ipatuman ang gipalapdan nga benepisyo alang sa senior citizens sa maong dakbayan human maamendar ang existing ordinance aron mas daghan ang maka-avail sa ayuda gikan sa lokal nga pangagamhanan.

Lakip sa tumong sa LGU ang paghatag og dugang serbisyo nga makatabang sa mga senior citizen sa ilang tambal, pagkaon, ug inadlaw-adlaw nga gasto.

Aron maka-avail, kinahanglan nga magpalista ang senior citizen sa barangay uban sa updated Senior Citizen ID, sundon kini sa validation sa LGU/OSCA aron masiguro nga kwalipikado, ug kuhaon ang allowance sa petsang ipahibalo sa barangay.

Inig-claim, kinahanglan dalhon ang Senior Citizen ID, valid ID, ug authorization letter kung representante ang mukuha.

Gibutyag ni Councilor Rolando Centillas Jr., Chairman sa Committee on Senior Citizen ug awtor sa ordinansa, nga ang pagdugang sa serbisyo usa ka padayon nga paningkamot sa konseho ug sa lokal nga pangagamhanan sa liderato ni Mayor Amie Galario.

“Isip Chairman sa Committee on Senior Citizen, dako akong pagpasalamat sa suporta sa akong mga kauban sa Konseho ubos sa pagdumala ni Vice Mayor Greizl Galario-Fernandez. Padayon ang serbisyo nga may gugma ug pag-atiman para sa atong mga katigulangan,” ingon ni Councilor Centillas. (melbmadera)