Isa ka Kagawad sa barangay sa Munisipyo sa Kitaotao, Bukidnon ang gisikop buntag sa Abril 5 gumikan sa kalapasan sa gipatuman nga Total Liquor Ban.

Matud ni Captain Jose Regner Sevilleno, officer in-charge sa Kitaotao Municipal Police Station (KMPS) nga ang suspek nailang si Robelio Lipatuan, 35, minyo, Barangay Kagawad ug residente sa Purok 4 sa Brgy. Cabalantian, Kitaotao.

Gikatahong ang suspek ubos sa impluwensya sa ilimnong makahubog ug naglasong sa iyang sari-sari store sa dapit.

Sa taho sa isa ka miyembro sa Barangay Public Safety Officer (BPSO) sa dapit, miresponde ang kapitan sa barangay uban sa mga BPSO, kapolisan ug militar. Narekober nila ang duha ka botelya sa beer sa dapit.

Atubangon sa nasikop nga si Kag. Lipatuan ang kalapasan sa Municipal Executive Order Numero 55 serye sa 2020 kon Total Liquor Ban.