Giila sa Department of Agriculture (DA) ang probinsya sa Bukidnon isip model province sa Integrated Rice Duck Farming System (IRDFS) in large scale

Sumala kini sa gipadayag ni Dir. Jose Apollo Y. Pacamalan, regional executive director sa DA-RFO X, niadtong Oktubre 2, 2025, sa NMACLRC, Dalwangan, Malaybalay City, Bukidnon.

Ang IRDFS usa ka sustainable agricultural practice nga naghiusa sa pagpanguma sa humay ug pag-atiman sa itik, diin ang mga itik nagtabang sa pagkontrol sa peste ug sa natural fertilization sa uma, samtang ang humay naghatag og pagkaon ug panalipod sa itik.

Kini nga sistema naghatag og doble nga benepisyo sa mga mag-uuma: mas taas nga produksyon sa humay ug dugang kita gikan sa itik.

Sa wet season sa 2026, target sa DA nga suportahan sa full scale ang 1,000 hectares sa mga uma sa Malaybalay ug Valencia City alang sa IRDFS.

Kini usa ka pagtuman sa marching order gikan sa kadagkuan sa ahensya, nga nagkinahanglan sa pagpatuman sa System of Rice Intensification (SRI) sulod sa IRDFS aron mapalambo ang ani ug sustainability sa produksiyon.

Gilusad na usab sa DA ang IRDFS Technology Demonstration sa Kahaponan, Valencia City, Bukidnon, sa wet cropping season sa kasamtangang tuig.

Ang proyekto naglakip sa paghatag sa mga farmers’ cooperators og mga liso sa humay, abono, itik, feeds, ug pukot aron maipakita ang epektibo ug praktikal nga implementasyon sa IRDFS sa lokal nga komunidad.

Pinaagi niini nga inisyatibo, gilauman nga mas mapalig-on ang kapasidad sa mga mag-uuma, mapataas ang produksyon sa humay, ug mapalambo ang kabuhayan sa agrikultura sa Bukidnon samtang gisustenir ang kalikupan ug praktis sa organikong panguma. (melbmadera)