Nakuryente ang isa ka 23-anyos nga dalaga samtang nag-empake sa iyang food cart duol sa San
Agustin Parish Church sa Valencia City, Bukidnon niadtong gabii sa Hulyo 20, 2026.

Sumala sa report sa Bukidnon Police Provincial Office (BukPPO), gilayon nga gidala ang
biktima ngadto sa Valencia Sanitarium Hospital aron matambalan. Siya nakaangkon og mga
samad sa tiyan ug sa mga tudlo sa tiil ug anaa na sa lig-on nga kahimtang.

Sa inisyal nga imbestigasyon sa kapolisan, nasayran nga kalit nga nahulog ang isa ka electrical
wire ug misangit sa mga food cart sa maong lugar, lakip ang gipanag-iyahan sa biktima. Tungod
kay adunay brownout niadtong higayona, gibutang sa mga tindera ang kable sa yuta aron
malikayan nga adunay maigo sa kuryente.
Apan, samtang nag-empake ang biktima ug nanaug gikan sa iyang food cart taliwala sa kusog
nga ulan, kalit nga mibalik ang suplay sa kuryente, hinungdan nga naigo siya sa kuryente.
Human sa insidente, nakigkoordinar dayon ang kapolisan sa First Bukidnon Electric Cooperative
(FIBECO) aron maseguro ang lugar ug mapaayo ang nadaot nga linya sa kuryente.
Padayon pa ang imbestigasyon sa mga otoridad aron matino ang tanang kahimtang nga
nakapahinabo sa insidente. (melbmadera)