Giaprobahan na sa Sangguniang Panlungsod ang Ordinance No. 1013 Series of 2023 mao ang mahatagan og tabang pinansyal ang pamilya sa nipanaw o deceased incumbent, appointed, og elected barangay officials

Kaniadtong Setyembre 27, 2022, unang giduso ni Councilor Brian Nelson Flores nga tukma lang nga pagahatagan ug tabang pinansyal ang mga pamilya sa mga opisyales sa barangay sa panahon sa ilang kasub-anan ug gi basa kini sa ikaduhang higayon kaniadtong Pebrero 21, 2023.

Pinasubay usab kini sa balaud nga ang mga opisyales sa barangay adunay mga benepisyo nga madawatan apan limitado lamang kini.

Hibaluan nga ang nag-una sa paghatag ug serbisyo sa katawhan mao ang mga opisyales sa kabarangayan. Sila usab ang unang dalangpanan sa panahon sa kalamidad labi na sa mga katawhan nga nanimuyo sa hilit nga dapit. Luyo niini haduol usab sila sa mga peligro ug disgrasya.

Tumong ug tinguha usab niini nga matabangan ang pamilya ug maibsan ang ilang kaguol sa panahon sa ilang pag taliwan.

Human sa masusing pagtuon, atol sa ika 34th regular session niadtong March 14, 2023, sa ikatulong higayon giduso ni Councilor Flores ug Councilor Zoltan Dindo D. Dinlayan ug hiniusang giuyunan sa konseho nga aprobahan ang nasangpit nga ordinansa.

Ang maong ordinansa gi aprobahan ug gi pirmahan kini sa halangdong Mayor Jay Warren Pabillaran kaniadtong Marso 26, 2023. (PR)