Gipahigayon kaniadtong Pebrero 10, 2026 ang groundbreaking ceremony sa Department of Agriculture (DA) pinaagi sa Mindanao Inclusive Agriculture Development Project (MIADP) alang sa Farm-to-Market Road (FMR) sub-project sa Daraghuyan Ancestral Domain sa Barangay Dalwangan, Malaybalay City, Bukidnon

Sumala sa press release sa City Government of Malaybalay, ang proyekto naglangkob sa pagpaayo ug pagsemento sa 1.184 kilometro nga dalan nga nagkonektar sa Sitio Damitan ug Sitio Ulanguhon sa maong barangay.  

Ang FMR adunay kinatibuk-ang kantidad nga ₱17,008,435.87 ug gilauman nga mahuman sulod sa 195 ka adlaw sugod sa implementasyon sa kontrata niadtong Pebrero 6, 2026. Ang proyekto ipatuman sa NDP Construction Development.

 Gilauman nga makahatag kini og dakong kaayohan sa mga residente sa Barangay Dalwangan ug sa tibuok Malaybalay City, ilabi na sa mga lumad nga mag-uuma, tungod kay mas mapadali ang pagdala sa ilang mga produkto ngadto sa merkado, mapalambo ang produksyon sa agrikultura, ug mas mapahapsay ang paghatag sa batakang serbisyo sa komunidad.  

Sa iyang mensahe, si MIADP PSO Regional Executive Director Macario “Bong” D. Gonzaga mipahayag nga ang proyekto nagtimaan sa bag-ong sinugdanan ug mas lig-on nga koneksyon tali sa programa ug sa komunidad sa Daraghuyan.  

Gitambongan ang seremonya nila DA Regional Executive Director Jose Apollo Y. Pacamalan ug Bae Inatlawan Adelina D. Tarino, IPs head sa Daraghuyan Ancestral Domain.  

Ang National Commission on Indigenous Peoples (NCIP), isip kauban sa pagpatuman sa MIADP, girepresentahan ni Ethnographic Commissioner Atty. Alberto S. Lagamon para sa Northern ug Western Mindanao; Ms. Glenda Alcantara Pua, Chief sa Socio-Economic Development Division ubos sa Office on Socio-Economic Services and Special Concerns (OSESSC); ug Engr. Chona Labaon sa Technical Management and Services Division (TMSD) sa NCIP Regional Office X.  

Nagpakita usab og suporta ang lokal nga panggamhanan sa Malaybalay pinaagi sa presensya nila Mayor Jay Warren R. Pabillaran, City IPMR Renato S. Sumbongan, City Agriculturist Engr. Richard B. Leono, City Planning and Development Officer Engr. Adrian R. Gamboa, City Engineer Leo Rustan M. Dela Cerna, Assistant City Engineer Elpidio Sumanduran, ug City Urban Development and Housing Officer Perfecto Ray Bayo Jr. (melbmadera)