Temporaryong gipasirado sa Local Government Unit (LGU) sa Kitaotao ang Greek Hills Resort
nga nahimutang sa Sitio Pulang Bato, Barangay Sinuda, human sa usa ka insidente diin nahulog
ang usa ka Indian tourist nga zipline rider sa dihang naputol ang kable sa zipline atol sa iyang
pagsakay

Sumala kang Police Major JoAnn Navarro, tigpamaba sa Police Regional Office-10 (PRO-10),
gikumpirma sa mga awtoridad nga gisuspenso una ang operasyon sa resort hangtud makompleto
niini ang tanang kinahanglanong safety requirements ug mapamatud-an nga luwas ang ilang mga
pasilidad alang sa publiko.
Nahitabo ang insidente niadtong Hunyo 14, 2026, ug nalambigit ang usa ka 25-anyos nga Indian
national nga temporaryong nagpuyo sa Davao City. Base sa inisyal nga imbestigasyon, hapit na
unta makaabot ang biktima sa pikas tumoy sa zipline sa dihang kalit nga naputol ang kable,
hinungdan nga nahulog siya gikan sa gibanabanang kapin sa 10 metros nga kahabogon.
Matud ni Navarro, dako ang pasalamat nga ang nahulogan sa biktima usa ka dapit nga adunay
sagbot ug medyo humok ang yuta, nga nakapamenos sa grabeng kadaot nga mahimo untang
naangkon niini. Ang biktima nakaangkon lamang og gagmayng samad ug minor injuries ug
gilayon nga gihatagan og medikal nga pag-atiman.
Gibutyag usab ni Navarro nga ang biktima sa sinugdan mihangyo nga dili na lamang ipaabot sa
kapolisan ang nahitabong insidente, maong nalangan ang opisyal nga pagreport niini ngadto sa
mga awtoridad.
Apan human mikatag ug nag-viral sa social media ang video sa maong hitabo nga gi-upload sa
usa sa mga nakasaksi, gilayon kining gisusi sa kapolisan sa pakigtambayayong sa LGU-Kitaotao
ug gilunsad ang pormal nga imbestigasyon aron matino ang hinungdan sa aksidente.
Sa opisyal nga pahayag sa Greek Hills Resort, ilang gipasiugda nga ang kaluwasan sa ilang mga
bisita mao ang labing taas nilang prayoridad. Giila usab nila ang insidente nga nahitabo sa ilang
zipline niadtong Hunyo 14 ug gipasalig sa publiko nga ang nalambigit nga bisita luwas, maayong
kahimtang sa panglawas, ug nakadawat sa hustong medikal nga pag-atiman.
Sumala pa sa resort, human sa komprehensibong medikal nga eksaminasyon, ang biktima
nakapauli na ug komportable nga nagpahulay sa iyang pinuy-anan.
Gibutyag usab sa management nga nagpadayon na sila sa pagpatuman og serye sa mga lakang
aron mapalig-on ang kaluwasan sa ilang mga pasilidad.
Padayon karon ang imbestigasyon sa mga awtoridad aron masayran ang eksaktong hinungdan sa
pagkabugto sa zipline cable ug aron masiguro nga matuman ang tanang safety standards sa resort
sa dili pa kini tugotan nga makabalik sa operasyon. (Sean Sulugan)