Kaniadtong Agosto 20, 2025, gisugdan na ang mga kalihokan sa kasaulogan sa ikatulong Press Freedom Week Celebration sa Bukidnon

Kini pinaagi sa usa ka seminar nga nakatutok sa pagpalambo sa conflict-sensitive media ug peace journalism practice.

Si Department of the Interior and Local Government Bukidnon Provincial Director Rhona Pedraza-Abadilla ang nipaambit sa maong hisgotanan.

Iyang nahatag ang mga panan-aw sa pagsabot sa kalinaw ug panagbangi, nga nagpunting sa mga yawe nga prinsipyo ug isyu nga angay mahibal-an sa lokal nga mga reporters sa pagtabon sa sensitibo nga mga butang.

Gipasiugda ni Abadilla ang papel sa media sa pagsabot, pagpamubo sa tensyon, ug pagpalig-on sa panaghiusa sa komunidad.

Ang ikaduhang adlaw sa seminar gipahigayon sa Agosto 22, 2025, sa susamang venue nga mao ang Provincial Human Resource Training Center sa Malaybalay City.

Ang maong inisyatiba nagpasabot sa pag-ila sa probinsyal nga kagamhanan sa mahinungdanong papel sa media sa pagpasiugda sa kalinaw pinaagi sa conflict-sensitive reporting ug peace journalism.

Ang week-long nga selebrasyon nagpasundayag og lain-laing kalihokan nga tuyo aron mapalig-on ang panag-uban ug kusog sa lokal nga komunidad sa media—lakip na ang mga training workshop, dula sa isports, outreach programs, pagpangtanom og kahoy, motorcade, ug fellowship gathering. (melbmadera)