Usa ka 37-anyos nga lalaki ang naligsan patay sa yellow wheel-type excavator sa Provincial Road, Spring Side Village, Brgy. Poblacion, Pangantucan, Bukidnon, kaniadtong Nobyembre 18, 2025

Ang personnel sa Pangantucan Municipal Police Station, kauban ang rescue personnel gikan sa Municipal Disaster Risk Reduction Management Center (MDRRMC), nitubag sa insidente.

Sumala sa report ni Police Captain Christopher P. Tuzara II, OIC sa Pangantucan MPS, nasayran nga sa pag-abot sa lugar, nakit-an ang biktima nga patay sa yuta tapad sa sakyanang nalambigit nga gimaneho sa 30-anyos nga lalaki.

Gipakita sa imbestigasyon nga ang biktima nagbubo og liquid asphalt sa konkreto nga dalan tali sa inner ug outer lanes sa dihang aksidenteng naigo siya sa wheel-type excavator samtang nagsulod kini sa provincial road samtang nagtuyok sa tuo.

Gidala ang biktima sa Pangantucan Doctors Hospital apan gideklarar siya nga patay pag-abot sa doktor nga midumala.

Ang drayber ug ang excavator anaa sa kustodiya sa Pangantucan MPS alang sa husto nga disposisyon. (melbmadera)