Isa ka mag-uuma ang gipusil patay sa hilit nga bahin sa Lagdik 8 sa Brgy Sta. Felomina, Quezon buntag sa Marso 3.

Si Police Major Mitchel Clemencio, officer in-charge sa kapolisan sa Quezon sa iyang taho ngadto sa Bukidnon Police Provincial Office, miila sa biktima nga si Pederillo Coca Sr., 52, minyo, mag-uuma ug residente sa dapit.

Si Pederillo nakaangkon sa grabing mga samad pinusilan sa lawas hinungdan sa iyang hinanaling kamatayon.

Matud sa imbestigasyon sa kapolisan sa Quezon, ang biktima naglung-ag sa dihang nahiabot ang duha ka tawo nga nangayo og tubig mainom. Kalit lang siyang gipusil sa mga suspek sa dihang gitunol na niya ang baso sa tubig ngadto sa mga suspek.

Padayon pa ang imbestigasyon sa kapolisan aron pagsuta sa motibo sa krimen ug pag-ila sa milayas nga mga suspek kinsa armado sa kalibre .9mm pistola.

By: Deigo M. Hidalgo