Isa ka 49-anyos nga mag-uuma ang nakuryentehan patay sa Purok 4, Brgy. Kalasungay, Malaybalay City, Bukidnon

Sumala sa report ni Police Lt. Col. Joepet B. Paglinawan, OIC sa Malaybalay City Police Station (MCPS), nadiskubre sa igsoong lalaki sa biktima ang gidangatan niini pasado alas 10:30 sa buntag sa Agosto 10, 2025.

Niresponde sa dapit ang kapolisan human nila nadawat ang report.

Nasuta nga ang lalaking biktima usa ka minyo ug residente sa dapit.

Siya nakaplagang patay nga naglutaw sa lanaw sa isda sa maong lugar samtang nagkupot og kable sa kuryente nga nag-agi sa lanaw.

Sa pagkuha sa lawas, nakita nga adunay klaro nga mga samad sa kamot ang namatay, nga posible nga timaan sa pagkakuryente.

Sa inisyal nga imbestigasyon, nasuta nga ang biktima nagtinguha nga ayohon ang nadaot nga kable sa kuryente sa lanaw, nga maoy hinungdan sa iyang aksidenteng pagkakuryente. (melbmadera)