Malampusong gisaulog sa City Government of Malaybalay ang ika-81 nga Liberation Day sa Malaybalay isip pagpasidungog sa mga bayani ug beterano nga nakigbisog alang sa kagawasan
atol sa Ikaduhang Gubat sa Kalibutan

Gihimo ang programa sa Kampo Kasisang sa Barangay Casisang niadtong Mayo 20, 2026, diin
gipasidunggan ang mga beterano pinaagi sa wreath laying ceremony ug 21-gun salute atubangan
sa historical marker ug shrine ni Manuel A. Roxas duol sa Casisang Elementary School.
Ang Kampo Kasisang adunay dakong papel sa kasaysayan tungod kay kini nahimong prisohan ni
kanhi Presidente Roxas, nga kaniadto usa ka brigadier general panahon sa World War II. Kauban
usab niyang gipriso si William F. Sharp, commander sa US Forces sa Visayas ug Mindanao,
uban sa kapin 6,000 ka mga sundalong Amerikano ug Pilipino.
Sa maong programa, mipakigbahin sa makasaysayanong kahulogan sa kalingkawasan sa
Malaybalay si post-war veteran nga si Danilo P. Pedroso, nga nagpahinumdom sa mga
sakripisyo ug kalisod nga giagian sa mga lumadnong bayani ug sundalo alang sa kagawasan sa
nasud.
Samtang si City Mayor Jay Warren R. Pabillaran naghatag og gibug-aton sa kamahinungdanon
sa paghinumdom sa mga sakripisyo sa mga beterano ug sa pagpadayon sa ilang kabilin sa
patriyotismo, panaghiusa, ug matinud-anong pag-alagad sa nasud.
Nagpadangat usab sa mensahe sa suporta si Col. Warren C. Munda, 403rd Deputy Brigade
Commander, alang kang Brig. Gen. Seigfred C. Tubalado, 403rd Brigade Commander, nga
nagpasiugda sa panaghiusa ug patriyotismo sa nation-building.
Ang selebrasyon nagsilbing usa ka mahukmanong pahinumdom sa kasamtangang henerasyon sa
paghatag bili sa kagawasan, kalinaw, ug patriyotismo, samtang nagpasidungog sa mga bayani
nga mitubag sa tawag sa panahon aron mapanalipdan ang nasudnong kagawasan. (melbmadera)