Nasikop sa mga otoridad ang most wanted person sa Munisipyo sa Baungon, Bukidnon didto sa Purok 22, Brgy. Butong, Quezon diin siyang nagtagotago buntag sa Abril 6.

Matud ni Major Mitchel Clemencio, officer in-charge sa Quezon Municipal Police Station (QMPS), ang suspek nailang si Randy Laguinding, 30, ulitawo, mag-uuma ug laborer, miyembro sa Batistil Group ug kasamtangan nanimuyo sa dapit diin siya nasikop.

Gisikop siya pinasubay sa warrant of arrest sa kasong murder ug attempted murder nga gimando sa Presiding Judge sa RTC 10, Branch 11 sa Manolo Fortich pinetsahan Hulyo, 26, 2017.

Nakorner si Laguinding sa dapit gumikan sa hiniusang puwersa sa kapolisan sa QMPS, Baungon MPS, Bukidnon Provincial Intelligence Battalion, Regional Mobile Force Battalion, Bukidnon Criminal Investigation and Detection Group (CIDG) ug Charlie Company sa Philippine Army.

Ang suspek ubos sa kustodya sa kapolisan sa Quezon sa pagkutlo ning balita.