Plantsado na ug andam na ang dakbayan sa Malaybalay sa pagpatuman sa Oplan Kaluluwa 2025 nga ipatuman sa Oktubre 31 hangtod Nobyembre 2

Gibutyag kini ni Mr. Alan M. Comiso, hepe sa City Disaster Risk and Reduction Management Office (CDRRMO), atol sa Kapihan Media Forum sa Function Hall sa City Hall sa Barangay Casisang, kaniadtong Oktubre 29, 2025.

Matod niya, mokabat sa 212 ka responders, medical teams, traffic enforcers, police officers, ug uban pa ang ipakatag sa tanang mga sementeryo sa Malaybalay.

Gawas pa niana, ang matag barangay magdestino sab og mga miyembro sa Barangay Public Safety Officer ug uban pang force multipliers.

Dugang niya nga gawas sa pagpatuman sa hapsay nga dagan sa trapiko, ila sab iplastar ang Incident Management Team, public assistance desk, maghatag og public information hotline, ug magplastar og lost and found booth. (melbmadera)