Malampusong nadala sa wala mailhing kawatan o mga kawatan ang duolan sa ₱800,000.00 nga kantidad sa nagkalain-laing cellular phones gikan sa DM Gadgets and Appliances, nga nahimutang duol sa Bernal Rice Milling, Purok 4, Bernal St., Brgy. Batangan, Valencia City, Bukidnon

Sumala sa report sa Valencia City Police Station, nadiskobre sa saleslady sa tindahan ang insidente pasado alas 8:00 sa buntag niadtong Enero 23, 2026, ug nadawat sa kapolisan ang taho usa ka oras human nasuta ang hitabo.  

Nakadiskobre usab ang saleslady nga ang usa ka bahin sa likod nga konkreto nga pader sa establisemento giguba, diin naghimo og lungag nga gituohang gigamit sa suspek o mga suspek isip agianan sa pagsulod.  

Sa dugang nga pagsusi sa palibot, nasuta nga ang usa ka bahin sa perimeter wall sa silingang Bernal Rice Milling ang giguba usab aron makahimo og laing lungag. Gituohan nga gigamit kini sa mga suspek isip unang agianan sa wala pa sila makasulod sa DM Gadgets and Appliances.  

Tungod niini, ang tanang police units daling gipahimutang sa full alert, ug ang mga intelligence operatives gipadagan na aron magsugod sa koordinadong hot pursuit operation nga nagtumong sa dinaliang pagkaila ug pagkadakop sa mga suspek. (melbmadera)