PANGANTUCAN, Bukidnon – Ang Department of Agriculture – Regional Field Office 10 (DA-10), pinaagi sa Livestock Program niini, opisyal nga nagtugyan sa Php 5.5 milyon nga biosecured swine fattening facility ngadto sa Local Government Unit (LGU) sa Pangantucan niadtong Setyembre 23, 2025

Gipondohan sa ilalum sa Integrated National Swine Production Initiatives for Recovery and Expansion (INSPIRE) program, ang proyekto naglakip sa 2,500-square meter nga fattening facility nga adunay perimeter fence, mga breeder nga baboy, feeds, ug mga veterinary drugs ug biologics. Ang paghatud sa mga breeder ug feeds sugdan human makompleto ang procurement process.

Si Pangantucan Mayor Manolito G. Garces nagpasalamat sa DA-10 sa padayon nga suporta niini ug giila ang agrikultura isip usa sa mga pangunang pwersa sa ekonomikanhong pagtubo sa lungsod.

Samtang si DA-10 Regional Technical Director for Operations Carlota S. Madriaga midayeg sa LGU sa malampusong pagpatuman sa proyekto. Siya nagpahayag og paglaum nga ang pasilidad makatabang sa pagpahapsay sa panginabuhi sa mga mag-uuma og baboy sa lungsod.

Si Municipal Agriculturist Teodor B. Quirante III usab nagpunting sa epekto sa proyekto sa lokal nga produksyon sa baboy.

“Pinaagi niini nga interbensyon, naglaum kami nga mapauswag ang kinabuhi sa atong mga mag-uuma og baboy samtang masiguro nga makapadako sila og baboy nga mas lig-on ug walay dagkong kapildihan,” matod niya.

Ang INSPIRE program, nga gisugdan niadtong 2021, gilaraw aron mabuhi pag-usab ang industriya sa baboy isip lakang sa pagbangon gikan sa African Swine Fever (ASF) outbreak.

Kini nagpunting sa pagpahiuli sa kapasidad sa produksyon, pagsiguro sa lig-on nga suplay sa baboy ug karne, ug pagpanalipod sa panginabuhi sa mga mag-uuma og baboy sa tibuok nasud. (pr/melbmadera)