Gipapaspasan ni Valencia City Mayor Amie Galario ang subdivision plan sa natino nga relocation site sa Brgy. Pinatilan

Tumong niini aron madungan sa paghatag sa cash assistance gikan sa Department of Human Settlements and Urban Development ug sa LGU, nga tuyo para sa pagpamalit sa materyales aron masugdan dayon ang pagtukod sa bag-ong mga balay sa maong luwas nga lugar.

Nahitabo kini human napresentar sa City Disaster Risk Reduction and Management Office (CDRRMO) ang mga rekomendasyon ug plano alang sa disaster response, recovery ug rehabilitation human sa baha nga nakaigo sa walo ka barangay sa dakbayan kaniadtong Setyembre 17, 2025.

Sumala sa ulahing Facebook post sa city government sa Valencia, apil niini ang pagrelokar sa mga pamilya nga naapektuhan, ilabi na kadtong hingpit nga nadaot ang ilang panimalay ingon man kadtong anaa nagpuyo sa river easement sa Panlibatuhan Creek. (melbmadera)