Ang Department of Agriculture (DA) Region 10 mitunol sa ikaupat nga higayon og tag P 5,000.00 nga cash assistance ngadto sa matag mag-uuma sa humay sa Malaybalay

Sumala sa kasayoran sa dakbayan, ang mga benepisaryo narehistro sa Registry System for Basic Sectors in Agriculture (RSBSA) nga adunay luna nga dili molapas sa duha ka ektarya sa humayan.

Kini pinaagi sa Rice Competitiveness Enhancement Fund – Rice Farmers Financial Assistance sa DA.

Gipahigayon ang pagpasiugda pinaagi sa koordinasyon sa buhatan sa City Agriculture kabahin sa pagpang apod-apod sa tabang pinansyal ngadto sa mga benepisaryo didto sa barangay Violeta Covered Court ning dakbayan niadtong Pebrero 27, 2024.

Mahinumdoman nga adunay iskedyul sa distribusyon usab ang nahitabo niadtong Disyembre 1-2, 2022 ubos sa RFFA 3 ug Marso 4, 2023 ubos sa RFFA 2.

Kasamtangan, adunay 1,918 ka mga mag-uuma ang nalista ug na-validate alang sa RFFA basi sa DA Farmers and Fisherfolks Registry System.

Ang programa gitambongan nila ni Provincial Operations Head Janeth D. Lopez, Vice Mayor Estelito R. Marabe, mga konsehal nga si Alan Ryan O. Legaspi, Niko P. Aldeguer, Brian Nelson T. Flores, Zoltan Dindo D. Dinlayan, Cromwell Kiril D. Dinlayan, Erwin A. Damasco ug Christopher Lambert N. Tortola.

Kauban usab ang presensya ni Kapitan Efren Omallao ug Engr. Richard B. Leono, OIC sa City Agriculture Office.

Gipasabot ug gidasig sa nitambong nga mga opisyal ang mga mag-uuma nga gamiton ang tabang nga nadawat sa pagpalit sa farm inputs aron mapauswag ang ilang kinitaan sa pagpanguma. (Diego M. Hidalgo)