Ang Manobo Indigenous Cultural Community sa Barangay Mendis, Pangantucan, Bukidnon, nagtapok na usab aron sa pag-obserbar sa ilang tinuig nga ritwal nga Salilay ta Karatungan kaniadtong Marso 14, 2026, sa Sitio Mandum

Sumala sa kasayoran sa munisipyo sa Pangantucan, gihimo kini isip pagpasidungog sa balaang Bukid Kalatungan sa Bukidnon.

Pinangunahan ni Datu “Sulutan Karatung Intuyadag” Erio Inahan ug sa konseho sa mga tigulang, ang seremonya usa ka panagtigom sa pasalamat diin gipadangat ang mga pag-ampo ug halad ngadto sa Karatungan, ang bukid nga giila isip buhi nga espiritwal nga presensya ug tigpanalipod sa mga katigulangan.

Dugang sa kasayoran nga ang ritwal nagpakita sa pasalamat alang sa padayon nga mga panalangin sa komunidad, sa yuta, ug sa tanang kinabuhi nga gisuportahan sa mga kalasangan ug katubigan niini.

Kini nga balaang tradisyon nagpakita sa adunahang kultural nga kabilin ug sa lalom nga espiritwal nga koneksyon sa katawhang Manobo ngadto sa ilang yutang kabilin. (melbmadera)