Naugdaw sa sunog ang usa ka school building sa Sityo Kaulayanan, Barangay Lirongan, Talakag, Bukidnon, niadtong buntag sa Enero 4, 2026

Ang nasunog nga pasilidad naglangkob sa tulo ka classrooms ug usa ka principal’s office, lakip na ang usa ka makeshift storage room nga nahugno tungod sa kalayo.

Sumala sa report ni Police Major Kevin P. Bangsoy, hepe sa Talakag Municipal Police Station, nadawat sa Bureau of Fire Protection (BFP)-Talakag ang report nga ang sunog nagsugod pasado alas 2:15 sa buntag. Gikataho nga nadugay ang pag-report sa insidente tungod sa kakuwang sa signal sa cellular sa maong dapit.

Nadeklarar ang fire out mga alas 9:45 na sa buntag, kapin sa pito ka oras human nagsugod ang sunog. Sa pagkakaron, wala pa matino ang hinungdan sa maong katalagman. Gibanabana nga mokabat sa ₱266,250.00 ang kantidad sa danyos nga nahimo sa insidente. (Omar Rashid Z. Abdullah)