Gidala sa Health Center Infirmary sa Quezon, Bukidnon ang isa ka lalaki human nasamad ang tuo nga bahin sa iyang nawong gumikan sa pagbusikad sa isa ka hand grenade gabii sa Setyembre 3, 2025

Sa iyang report, si Police Lt. Col. Noel F. Cano, hepe sa Quezon Municipal Police Station, niila sa biktima nga isa ka 46-anyos nga security officer sa Del Monte Packing House nga nahimutang sa Purok 3, Brgy. San Jose, Quezon.

Sa inisyal nga imbestigasyon, nasayran nga sa wala pa mahitabo ang insidente, ang biktima ug ang iyang kauban sa trabaho nag-inom sa sulod sa mess hall.

Sa dihang nahubog sila, giingon nga gikuha niini ang isa ka hand grenade gikan sa iyang sling bag ug gihuptan, apan wala madugay aksidenteng nahulog ug nibuto.

Si Cano nangayo og tabang gikan sa Bukidnon Explosive and Canine Unit ug sa Bukidnon Forensic Unit alang sa post-blast nga imbestigasyon ug pagproseso sa crime scene. (melbmadera)