Human sa mga bulan nga mabungahon nga buluhaton, naka-graduate na ang 21 ka mga mag-uuma sa Malaybalay City sa farmers-field-school sa Organic Rice Production
Sumala sa kasayoran, ang gradwasyon gipahigayon niadtong Disyembre 12, 2023 sa Lourdes Resort, Lunokan, Miglamin, Malaybalay City.
Sa mga naka-graduate, 15 kanila mga babaye ug unom mga lalaki.
Ang graduation ceremony gipangunahan ni City Mayor Atty. Jay Warren R. Pabillaran.
Diha sab sila Konsehal Alan Ryann O. Legaspi, chairperson sa committee on agriculture, Dr. Janeth Lopez, provincial operations center head sa DA Region X, Mr. Mark Anthony Lagamon, organic program coordinator, Vic Ian T. Alcontin, CAgO field operations division chief, Ms. Blecy Grace Mahilum kinsa representante ni Barangay Captain Alfonso A. Inocando, Barangay Kagawad Remy Castañares ug MAFSWISA Chairman Roland Ripoledon.
Mipaambit si Dr. Lopez sa iyang mensahe sa kamahinungdanon sa organic practices lakip na ang land health management, pest and disease control, ug organic fertilization nga makapaminos sa epekto sa kinaiyahan, makapalambo sa water and land conservation, ug ingon man sa biodiversity sa mga umahan.
Gipaabot niya nga sa umaabot ang organikong teknolohiya nga gitudlo magamit ug matudlo sa ubang mga mag-uuma.
Samtang si Lagamon miila sa inisyatiba sa City Government of Malaybalay sa pagpalambo sa Organic Agriculture ug nanghinaut nga ang mga partisipante mapasalamaton niini. Iyang giawhag nga magpraktis og organic farming kay anaa kanunay ang gobyerno nga mosuporta.
Si Mayor Pabillaran sa iyang mensahe naghisgot mahitungod sa environmental concerns nga
maporma ngadto sa isa ka palisiya sama sa mga yuta nga 18 porsyento sa bakilid o labaw pa nga gideklarar na nga alienable ug disposable ibalik sa klasipikasyon sa mga yuta sa kalasangan, aron maporma, bahin sa mga reserba sa kalasangan, gawas kon sila nasakop na sa kasamtangan nga mga titulo nga giaprobahan nga aplikasyon sa publikong yuta.
Nahisgutan usab niya sa mga partisipante kung asa nahitabo ang pagbaha sa barangay aron iyang matubag pinaagi sa pagpaambit sa kamahinungdanon sa pagpraktis sa organic farming.
Iyang gihagit ang mga partisipante sa paggamit sa ilang nakat-unan aron makatabang sa ilang komunidad.
Sumala pa ni Konsehal Legaspi nga ang lima ka Participatory Guarantee System Organic
Farmers makadawat na og PhP 200,000 matag isa ug nahisgutan usab ang mga hinabang nga
ihatag sa CAgO. Gipahinumdoman niya ang mga partisipante nga padayon ang pagkat-on ug
matudloan usab ang mga silingan sa kahibalo nga ilang naangkon.
Gipasiugdahan sa City Agriculture Office (CAgO) ang farmers-field-school (FFS) on Organic
Rice Production.
Kini gilunsad niadtong Hulyo 12, 2023 ug nagsugod sa pag-transplant niadtong Hulyo 24, 2023 sa Sitio Maranhog, Miglamin Malaybalay City. Kini adunay gilapdon nga 0.5 ka ektarya nga gipanag-iya sa FFS Cooperator nga si Mr. Joereni L. Calfoforo.
Gibahin ang pagtuon sa upat ka grupo aron adunay pagtandi sa abot. Atol sa pag-ani niadtong
Nobyembre 8, 2023, ang Group 2 nagpakita sa pinakataas nga average sa crop cut yield component nga adunay 4.6 kg, sunod ang Group 1 nga adunay 4.4 kg, sunod ang Group 3 nga adunay 3.6 kg, ug Group 4 nga adunay 3.3 kg.
Nakakuha ang demonstrasyon og kita nga PhP78,000.00 ug gikuhaan og Php 33,725.00 nga gasto. Nagresulta kini sa net income nga PhP44,275 o katugbang sa 131 percent nga pagbalik sa puhunan.
Kung itandi ang data sa crop cut sa isa ka ektarya, makita nga moabot ang produksyon niini sa 7
tonelada.
Lakip sa mga Agricultural Extension Officers nga nagpahigayon sa maong FFS mao sila si Mr.
Marvin L. Zamora, Ms. Rajane R. Paurom, Ms. Jenalyn C. Avergonzado, Mr. Niño Jan M.
Pabillaran, Mr. France Guiller R. Buquiran, ug Ms. Darylene R. Tuala. (Gecel Quinquiño-Ocon, Agri-NADA/melbmadera)