Saturday, January 28, 2023

Mag-uuma sikop sa drug buy-bust sa Kalilangan

Isa ka mag-uuma ang gisikop sa hiniusang pwersa sa kapolisan sa gipahigayon nga drug buy-bust operation sa Sitio Cogo, Macaopao, Kalilangan, Bukidnon niadtong Enero 16, 2023.

Gibutyag sa report ni Police Maj. Merlin M. Macawili, OIC sa Kalilangan Municipal Police Station, nga ang suspek mao si Minsuari Ampatua y Ampatua aka “Minsu”, 30, minyo, ug residente sa Purok-6, Mimbuaya, Lanao del Sur.

Nakuha gikan sa iyang posesyon ang gibana-bana nga 12 gramo sa gidudahang shabu nga adunay standard drug price nga Php 81,600.00.

Kasong paglapas sa RA 9165 ang gi andam batok sa arestado. (Omar Rashid Z. Abdullah)

2 mag-uuma gipanigbas sa Valencia

Gidala sa hospital ang duha ka cmga mag-uuma human gipanigbas sa duha ka mga suspek sa Purok 4, Brgy. Lurugan, Valencia City, Bukidnon buntag sa Mayo 27.

Si Police Lt. Col. Cipriano V. Bazar Jr., hepe sa kapolisan sa Valencia, niila sa mga biktima nga si Ernesto Dela Cruz, Jr. y Sarte, 35, ulitawo, mag-uuma ug residente sa Purok 4, Brgy. Lurugan, Valencia City ug Jason Dela Cruz y Abesta, 27, ulitawo, mag-uuma ug residente sa Purok 7, Busdi, Malaybalay City.

Gidala sila sa Seventh-day Adventist Medical Center, Brgy. Poblacion, Valencia City gumikan sa mga samad tinigbasan nga ilang naangkon.

Ang mga suspek nailang si Roberto Subalan Jr., y Antolijao, 29, mag-uuma, residente sa Purok 4, Brgy. Lurugan, Valencia City ug isa ka alias Bobong.

Sa inisyal nga pakisusi sa kapolisan sa Valencia, ang mga biktima nag-harvest sa mais sa sa dapit sa dihang gipanigbas sa mga suspek kinsa nisibat human sa krimen.

Nagpadayon pa ang imbestigasyon sa kapolisan sa Valencia alang sa kasulbaran sa maong kaso.

Liog sa mag-uuma gilaslas sa Damulog

Gilaslas ang liog sa isa ka mag-uuma human gikalalis niini ang suspek gabii sa Pebrero 28 sa Purok 1, Brgy. Maican, Damulog, Bukidnon.

Si Police Col. Jun Mark J. Lagare, provincial director sa Bukidnon Police Provincial Office (BPPO), niila sa biktima nga si Janer Morales y Tamon, 35, mag-uuma, adunay kapuyo ug residente sa dapit. Nakaangkon siya sa samad sa walang bahin sa likod sa liog ug gidala sa Bukidnon Provincial Hospital sa Brgy. Palma, Kibawe, Bukidnon.

Ang suspek nailang si Alejandro Corbeta y Garan “Alyas Andot”, 43, mag-uuma, minyo, ug residente sab sa dapit.

Sa imbestigasyon sa kapolisan, nasayran nga ang suspek ug biktima adunay dringking spree. Samtang ang suspek nisayaw atubangan sa kapuyo sa biktima, nagselos ug nasuko ang naulahi ug nagkalalis ang duha. Ang suspek niuli apan nibalik kini bitbit ang sanggot ug gilaslas ang liog sa biktima.

Si Corbeta boluntaryong nitahan sa niresponding kapolisan. Siya ubos sa kustodya sa kapolisan sa Damulog samtang gihikay na ang kasong frustrated murder batok kaniya.