Malampusong nasakmit sa tropa sa 403rd Infantry Brigade ang duha ka high-powered firearms ug nagkalain-laing kagamitan sa gubat human sa usa ka armadong engkwentro batok sa mga salin sa Communist Terrorist Group (CTG) sa Malaybalay City, Bukidnon

Sumala sa militar, nahitabo ang kapin 20 minutos nga bakbakan sa Sityo Mahawan, Barangay Busdi, Malaybalay City, niadtong Hunyo 6, 2026, atol sa padayong focused military operations sa maong lugar.

Human sa engkwentro, gilunsad dayon sa mga tropa ang clearing operation diin ilang narekober ang duha ka M16A1 rifles ug ubang kagamitan nga adunay operational significance nga gibiyaan sa mga miyembro sa New People’s Army (NPA) atol sa ilang pag-atras.

Sa iyang pahayag, si Brigadier General Seigfred C. Tubalado, commander sa 403rd Infantry Brigade, midayeg sa mga naglihok nga tropa tungod sa ilang paspas, organisado, ug koordinadong aksyon nga, matud pa niya, nagpakita sa padayong kalig-on sa mga operasyon sa seguridad sa probinsya.

Gibutyag usab ni Tubalado nga ang kalampusan sa operasyon resulta sa padayon nga paningkamot sa militar sa pagpugong sa mga armadong grupo ug sa pagmintinar sa kalinaw ug kaluwasan sa mga komunidad sa Bukidnon.

Samtang, gisubli ni Major General Marion T. Angcao, commander sa 4th Infantry Division, ang pasalig sa dibisyon sa pag-neutralisa sa mga armadong hulga ug pagpalig-on sa kalinaw ug kalamboan sa tibuok area of responsibility niini.

Ang maong operasyon gipahigayon pinaagi sa hiniusang paningkamot sa 1st Special Forces Battalion, 26th Infantry Battalion, 88th Infantry Battalion, ug 8th Infantry Battalion isip kabahin sa mas pinalapad nga kampanya sa militar batok sa nahibiling mga rebelde sa rehiyon. (melbmadera)