Pormal nga gilunsad sa City Government of Valencia, uban sa mga kaabag nga ahensya ug organisasyon, ang selebrasyon sa National ICT Month 2026 pinaagi sa Kick-Off Ceremony nga gipahigayon sa Atrium sa Robinsons Valencia niadtong Hunyo 8

Gidala sa maong selebrasyon ang tema nga “Bridging Divides, Powering Innovations, and Empowering the Next-Gen Global Valencianos,” nga naghatag og gibug-aton sa papel sa Information and Communications Technology (ICT) sa pagpalig-on sa konektibidad, pagdasig sa kabag-ohan, ug paghatag og mas daghang digital nga oportunidad alang sa katawhan.

Gipangunahan sa City Government of Valencia ang kalihokan uban sa suporta ni Mayor Amie G. Galario ug Vice Mayor Greizl Galario-Fernandez. Gitambongan usab kini sa mga representante gikan sa nagkadaiyang national government agencies, educational institutions, pribadong sektor, ICT advocates, exhibitors, innovators, mga estudyante, senior citizens, esports players, ug mga partisipante sa hackathon.

Sa iyang mensahe, gipasiugda ni Vice Mayor Galario-Fernandez ang kamahinungdanon sa padayon nga pagdawat ug paggamit sa teknolohiya isip instrumento sa inclusive development, maayong pangagamhanan, ug mas episyenteng paghatag sa mga serbisyo publiko alang sa mga Valenciano.

Usa sa mga mahinungdanong higayon sa kalihokan mao ang opisyal nga paglunsad ug ceremonial signing sa Valencia City 2-in-1 Citizen’s ID ug GCash Disbursement Card, usa ka inisyatiba nga nagtumong sa pagpalig-on sa digital governance ug pagpasayon sa paghatod sa mga serbisyo ug benepisyo ngadto sa katawhan pinaagi sa modernong teknolohiya.

Gipasiugda usab ni Engr. Michael Andrew Buot, assistant regional director ug provincial director sa Department of Information and Communications Technology (DICT) Region X, ang importansya sa digital transformation ug digital inclusion aron masiguro nga walay komunidad nga mabiyaan sa pag-uswag sa teknolohiya.

Samtang, gipahinumdum ni Dr. Mark Lemuel Garcia, regional director sa Department of Science and Technology (DOST) Region X, ang dakong papel sa siyensya, teknolohiya, ug innovation isip mga nag-unang pwersa sa kalamboan, kompetisyon, ug malungtarong pagtubo sa ekonomiya.

Pinaagi sa selebrasyon sa National ICT Month 2026, gipakita sa Dakbayan sa Valencia ang padayon nga paningkamot niini sa pag-andam sa mga Valenciano alang sa usa ka mas konektado, digital, ug global nga kaugmaon. (melbmadera)