Duha ka tawo ang namatay samtang tulo pa ang naangol sa isa ka self-accident nga nahitabo sa
Sayre Highway, Purok 3, Barangay Base Camp, Maramag, Bukidnon, alas-2:00 sa kadlawon
niadtong Hulyo 20, 2026.

Sumala sa report sa Bukidnon Police Provincial Office (BukPPO), ang naaksidenteng sakyanan
isa ka asul nga Suzuki Multicab nga gimaneho sa isa ka 48-anyos nga lalaki. Ang drayber
giubanan sa upat ka pasahero, lakip ang isa ka 46-anyos nga babaye ug tulo ka mga lalaki nga
mga hamtong na ang pangidaron.
Sa inisyal nga imbestigasyon, padulong sa Barangay San Roque ang multicab gikan sa sentro sa
Maramag sa dihang miabot kini sa dapit sa insidente. Gituohang kalit nga mipreno ang drayber
apan tungod sa kusog nga ulan ug danlog nga karsada, nawad-an siya og kontrol sa manibela.
Misubay ang sakyanan sa daplin sa dalan ug mibangga sa konkretong culvert.

Tungod sa kusog sa impact, naipit ang drayber sulod sa sakyanan samtang nanglagpot ang upat
ka pasahero. Dali silang girespondehan sa Maramag Rescue Team ug gidala sa Bukidnon
Provincial Hospital–Maramag aron matambalan.
Apan, gideklarar nga dead on arrival (DOA) ang drayber ug ang isa ka babayeng pasahero.
Samtang, ang tulo ka naluwas nga pasahero padayon pang gipaubos sa pagtambal sa maong
ospital.
Padayon pa ang imbestigasyon sa kapolisan aron matino ang tanang kahimtang nga
nakapahinabo sa aksidente. (melbmadera)