Gisugdan niadtong Oktubre 13 ang pre-construction conference alang sa ₱209-milyong proyekto
sa pagsemento sa farm-to-market road nga nagdugtong sa Junction Barangay Guinoyuran
Provincial Road paingon sa Sitio Migtulod sa Barangay Mt. Nebo, ning dakbayan.

Sigun sa city government of Valencia, ang proyekto, ubos sa Philippine Rural Development
Project (PRDP), adunay gitas-on nga 8.30 kilometros ug nagkantidad og ₱209,004,855.23.
Gihisgotan atol sa pre-construction conference ang mga detalye, teknikal nga kinahanglanon ug
koordinasyon nga gikinahanglan aron masiguro ang hapsay nga pagpatuman sa proyekto sa dili
pa magsugod ang aktuwal nga konstruksyon.
Gilaoman nga pinaagi sa maong proyekto, mas mapaayo ang koneksiyon sa mga komunidad ug
mapadali ang pagdala sa mga produktong pang-agrikultura gikan sa mga umahan ngadto sa mga
merkado.
Gilaoman usab nga makatabang ang mas maayong dalan sa pagpakunhod sa kalisod sa
transportasyon sa mga mag-uuma ug pagpalapad sa ilang kahigayonan sa pagpamaligya sa mga
produkto.
Gipahayag sa lokal nga pangagamhanan ubos sa pagpangulo ni Mayor Amie Galario, kauban ang
ika-10 Sangguniang Panlungsod nga gipangulohan ni Vice Mayor Greizl Galario-Fernandez, ang
padayong suporta niini sa mga proyekto sa imprastraktura nga nagtumong sa pagpauswag sa mga
barangay ug panginabuhian sa mga residente. (melbmadera)