Padayong gitutokan sa pangagamhanang probinsyal sa Bukidnon ang pagsiguro nga ang mga
benepisyo sa kalamboan sa ekonomiya direktang maabot sa katawhan.

Kini ang gipasiugda ni Gobernador Rogelio Neil P. Roque atol sa Provincial Product Accounts
Dissemination Forum nga gipahigayon sa Philippine Statistics Authority o PSA-Bukidnon
niadtong Oktubre 13.
Sumala sa gobernador, importante nga dili lamang motubo ang ekonomiya kondili makita usab
ang positibong epekto niini sa kinabuhi sa mga residente.
Base sa datos sa PSA, mitubo og 2.7 porsiyento ang ekonomiya sa Bukidnon niadtong 2025, mas
hinay kumpara sa 3.8 porsiyentong pagtubo sa miaging tuig. Ang ekonomiya sa probinsya
gibana-bana nga mikabat sa 274.85 bilyong pesos.
Lakip sa mga sektor nga nagtala og kusog nga pagtubo ang public administration and defense
nga 17.8 porsiyento, health and social work nga 14.3 porsiyento, ug financial and insurance
activities nga 11.4 porsiyento. Apan mikunhod og 18.6 porsiyento ang construction ug 9.3
porsiyento ang mining and quarrying.
Gipasiugda ni Roque nga gamiton sa probinsya ang maong datos isip giya sa pagtakda sa mga
prayoridad, pagbahinbahin sa pondo sa publiko ug paghimo sa mga programa nga motubag sa
tinuod nga panginahanglan sa mga komunidad.
Lakip sa mga inisyatiba nga gihatagan og pagtagad ang pagpalambo sa industriya sa kape
pinaagi sa Bukidnon Coffee Roadmap ug ang pagtukod sa lig-on nga industriya sa gatas o dairy,
nga nagtumong sa pagpalambo sa panginabuhian ug pagpanalipod sa kinaiyahan. (melbmadera)