Natigayon niadtong Pebrero 16, 2026 ang blessing ug pagtugyan sa 67 ka Patient Transport Vehicles (PTVs) ngadto sa 67 ka mga barangay sa Bukidnon

Sumala sa press release sa LGU Bukidnon, kini mao na ang ikalimang hugna sa pag-apod-apod sa maong mga sakyanan sa kabarangayan.

Ang proyekto gipondohan sa Provincial Government of Bukidnon og ₱100,835,000 gikan sa Local Disaster Risk Reduction and Management Fund (LDRRMF) pinaagi sa Provincial Disaster Risk Reduction and Management Office–Bukidnon.

Si Gobernador Rogelio Neil P. Roque ang nanguna sa kalihokan nga gipahigayon sa Capitol Grounds sa Malaybalay City.

Sa distribusyon, siyam ka PTV ang nadawat sa Quezon, pito sa San Fernando, unom matag usa sa Talakag, Malaybalay City, ug Kitaotao; taglima sa Dangcagan, Cabanglasan, ug Don Carlos; upat sa Baungon; tagtulo ang Manolo Fortich, Kadingilan, Kibawe, ug Damulog; ug tag-usa ang Impasug-ong ug Maramag.

Dugang pa, 97 na lamang sa 464 ka barangay sa probinsya ang wala pa makadawat og PTV. (melbmadera)

Natigayon ang blessing ug turnover ceremony sa 67 ka Patient Transport Vehicles didto sa Capitol Grounds sa Malaybalay City, Bukidnon niadtong Pebrero 16, 2026. (LGU Bukidnon)