Gipusil sa wala nailang suspek ang 73-anyos nga lalaki samtang nagkaon sulod sa iyang panimalay sa Purok 10, Brgy. 1, Malaybalay City, Bukidnon, gabii sa Nobyembre 23, 2025

Si Police Lt. Col. Joepet B. Paglinawan, chief of Police sa Malaybalay City Police Station, sa iyang report nag-ingon nga ang biktima dali dayong gidala sa Malaybalay Emergency Unit padulong sa Bukidnon Provincial Medical Center (BPMC) alang sa medikal nga pagtambal. Apan, usa ka oras pagkahuman, gideklarar nga patay ang biktima sa doktor nga midumala.

Gipakita sa imbestigasyon nga mga alas 8:10 sa gabii sa maong petsa, samtang nagkaon ang biktima, usa ka wala nailhang suspek ang nipusil sa biktima nga naigo sa tuo nga dughan ug adunay exit wound sa iyang likod.

Duha ka fired cartridge cases ang nakaplagan sa likod nga bahin sa balay sa biktima, ug usa ka fired bullet nakaplagan sulod sa kusina diin nagkaon ang biktima.

Usa sa mga anak nga babaye sa biktima misulti nga ang insidente posibleng gikan sa panagbangi sa yuta, diin usa ka tawo nag-angkon og katungod sa maong propriedad.

Ang Malaybalay CPS kasamtangang nagpadayon sa lawom nga imbestigasyon aron maila ang posibleng person of interest. Ang posibleng motibo mao ang panagbangi sa yuta. (melbmadera)