Isip kabahin sa padayon nga paningkamot sa pagpalambo sa farm mechanization ug pagpaubos sa karga sa nagtubo nga presyo sa gasolina, ang Department of Agriculture – Regional Field Office 10 (DA-10) nag-apod-apod og PhP3.03 milyon nga fuel assistance ngadto sa 1,010 ka farmers beneficiaries sa probinsya sa Bukidnon

Gipahigayon ang distribusyon niadtong Oktubre 1 hangtod 2, ug natabonan niini ang mga lungsod sa Damulog, Dangcagan, Kitaotao, ug Quezon.

Ang suporta gihatag ilawom sa Fuel Assistance to Farmers Program (FAtFP), nga nagtumong sa pagtabang sa mga mag-uuma sa pagpaubos sa gasto sa produksyon ug pagbalhin sa full mechanization, labi na sa panahon sa taas nga presyo sa gasolina.

Ang matag kwalipikadong mag-uuma nakadawat og Intervention Monitoring Card (IMC) nga adunay sulod nga PhP3,000 nga fuel credits. Aron makwalipikar, ang mag-uuma kinahanglan adunay kaugalingon o nangabang nga operational farm machinery nga narehistro sa Agricultural and Biosystems Engineering Management Information System (ABEMIS) ug nakalista sa Registry System for Basic Sectors in Agriculture (RSBSA) ug/o sa Farmers and Fisherfolk Registry System (FFRS).

Aron mas mapalig-on pa ang suporta sa mechanization, ang DA-10, pinaagi sa Regional Agricultural Engineering Division (RAED), nag-awhag sa daghang mag-uuma nga irehistro ang ilang agricultural machinery ug equipment sa Registration of Ownership of Agricultural and Fisheries Machinery and Equipment System (RAFMES).

“Ang programa nga fuel assistance sa mga mag-uuma usa ka inisyatibo gikan sa Bureau of Agricultural and Fisheries Engineering (BAFE) aron mapalambo ang farm mechanization diri sa Northern Mindanao. Kini nagtabang sa mga mag-uuma sa paggamit sa modernong makina samtang napaubos ang gasto sa produksyon,” matod ni Engr. Romil G. Española, RAED-PPMS Chief. (pr/melbmadera)