Lima ka myembro sa giingong Communist Terrorist Group (CTG) ang boluntaryong misurender niadtong Enero 4, 2026, sa 1003rd Maneuver Company, Regional Mobile Force Battalion 10 (RMFB 10) Headquarters sa Sityo Colon, Barangay Halapitan, San Fernando, Bukidnon

Sumala sa report sa Police Regional Office 10, lakip sa mga misurender ang usa ka PSR-listed ug upat ka NPSR-listed nga mga indibidwal.

Gitugyan usab nila ang ilang mga armas nga naglangkob sa usa ka caliber .45 Safari Arms pistol nga adunay usa ka steel magazine nga kargado sa pito ka bala; usa ka homemade caliber .38 revolver nga adunay lima ka bala; usa ka homemade caliber .22 revolver nga adunay duha ka bala; ug duha ka homemade shotguns kauban ang 17 ka mga bala.

Nasayran nga ang lima ka misurender mga residente sa Sityo Nalubas, Talaingod, Davao del Norte.

Matod pa sa kapulisan, nakahukom ang mga indibidwal nga mosurender tungod sa kakapoy ug pagluya sa ilang kanhing paagi sa pagkinabuhi isip mga rebelde, ug nagpahayag sa ilang tinguha nga magpuyo nga malinawon kauban ang ilang mga pamilya.

Naimpluwensyahan usab sila sa ilang kanhing mga kauban nga una nang misurender ug nakadawat og tabang gikan sa gobyerno pinaagi sa mga programa sa reintegration, nga nagdasig kanila sa pagbiya sa armadong pakigbisog ug pagpili sa dalan padulong sa kalinaw ug normal nga kinabuhi.

Ang boluntaryong pagsurender gipasiugdahan sa 1003rd Maneuver Company, RMFB 10, uban sa suporta sa mga personahe gikan sa S2 RMFB 10, 1004th Maneuver Company RMFB 10, San Fernando Municipal Police Station, 1st ug 2nd Bukidnon Provincial Mobile Force Company, Bukidnon Police Intelligence Unit, Bukidnon Provincial Intelligence Team–Regional Intelligence Unit (PIT-RIU) San Fernando, ug Regional Public Safety Battalion (RPSB).

Sa pagkakaron, ang mga misurender nga sakop sa New People’s Army (NPA) anaa na sa kustodiya sa 1003rd Maneuver Company, RMFB 10, alang sa custodial debriefing ug profiling, samtang ang mga armas nga ilang gitugyan temporaryong gi-secure sa Supply Office sa maong unit.(melbmadera)