Duha ka 21-anyos nga babaye ang gidakop sa hiniusang buy-bust operation sa kapulisan sa
Purok 5, Barangay 9, Malaybalay City, alas 3:56 sa hapon niadtong Oktubre 9, 2026, diin
nasakmit ang gituohang shabu nga nagkantidad og ₱27,703.20.

Gipahigayon ang operasyon sa Drug Enforcement Unit sa Malaybalay City Police Station,
kauban ang 1st Bukidnon Provincial Mobile Force Company ug Provincial Intelligence Unit sa
Bukidnon Police Provincial Office.
Nasakmit gikan sa mga dinakpan ang tulo ka heat-sealed plastic sachet nga adunay puti nga
kristal nga substansiya nga gituohang shabu, nga mitimbang og 4.074 gramos, isa ka itom nga
coin purse ug ₱500 nga papel nga kuwarta.
Sumala sa kapulisan Bukidnon Police Provincial Office – Public Information Office, giandam na
ang pagpasaka og mga kaso batok sa mga suspek tungod sa giingong paglapas sa Sections 5, 11
ug 26, Article II sa Republic Act 9165 o Comprehensive Dangerous Drugs Act of 2002 as
amended.
Dad-on usab sa Provincial Forensic Unit ang mga nakumpiskang substansiya alang sa qualitative
ug quantitative examination aron matino ang ilang komposisyon ug gidaghanon.
Ang mga dinakpan anaa na sa kustodiya sa Malaybalay City Police Station alang sa
dokumentasyon ug hustong disposisyon.
Giawhag ni Bukidnon Police Provincial Director PCOL Oliver Sotto Navales ang katawhan nga
magpadayon sa pagtinabangay sa kapulisan ug uban pang ahensiya sa pagpatuman sa balaod
aron mapalig-on ang kalinaw ug mapugngan ang ilegal nga droga sa probinsya. (melbmadera)