Kaniadtong Enero 25, 2026, sa alas 3:35 sa buntag, usa ka 24-anyos nga miyembro sa Barangay Peacekeeping Action Team (BPAT) sa Barangay Besigan, Cagayan de Oro City, ang gipusil-patay sa Sitio Migpait, Barangay Indulang, Talakag, Bukidnon

Sumala sa imbestigasyon sa Talakag Municipal Police Station, ang biktima mitambong sa “likod-likod” (usa ka tradisyonal nga aktibidad sa wala pa ang kasal) sa iyang ig-agaw. Samtang nag-istorya ang biktima sa iyang ig-agaw, kalit nga nipusil ang suspek—usa ka lalaki nga anaa sa legal nga pangedaron—nga nagtindog duol sa trapal. Gamit ang usa ka .45 caliber nga pistola, naigo ang biktima sa iyang likod nga maoy hinungdan sa iyang pagkahagsa.  

Human sa insidente, daling nidagan ang suspek padulong sa wala mailhing direksyon. Nakolekta sa crime scene ang usa ka kabhang (fired cartridge case) sa .45 caliber nga pistola.  

Ang biktima daling gidala sa mga rescue personnel sa Talakag paingon sa BPH–Talakag, diin gideklarar siya nga dead on arrival sa nag-atiman nga doktor tungod sa grabeng samad-pinusilan sa likod.  

Ang mga personahe sa Talakag MPS daling nagpahigayon og hot pursuit operation, nga misangpot sa malampusong pagkadakop sa suspek. Kasamtangang anaa ang suspek sa kustodiya sa Talakag MPS ug gipaubos na sa inquest proceedings.  

Gikatakdang ipaubos sa paraffin test ang suspek, samtang ang nakolektang ebidensya ipadala alang sa ballistic examination. (melbmadera)