Natigayon ang ribbon-cutting ug turnover ceremony sa ₱302,100,085.13 nga Aquatic Center niadtong Pebrero 28, 2026, sa Bukidnon Sports Complex, Barangay Laguitas, Malaybalay City, Bukidnon

Sumala sa press release sa Provincial Government of Bukidnon, gibutyag ni Lilibeth Aparecio, regional director sa Department of Public Works and Highways (DPWH) Region 10, nga ang pondo alang sa multi-purpose building o Aquatic Center gi-alokar gikan sa opisina ni Senador Juan Miguel F. Zubiri.

Matod ni Aparecio, ang proyekto adunay 50-meter by 25-meter nga 10-lane swimming pool nga may kapasidad nga 1,024 ka mga manan-aw, kumpleto sa locker rooms, administrative offices, ug athlete support facilities—usa ka world-class venue alang sa lalawigan sa Bukidnon.

Mapasigarbuhon usab si Senador Zubiri sa mga imprastraktura nga nahatud sa iyang opisina sa probinsya, ug gipadayag ang iyang tinguha nga maila isip senador nga naghatag og mga proyekto nga labing gikinahanglan sa katawhan sa lalawigan.

Sa maong okasyon, iyang gibutyag ang plano nga mag-host sa umaabot nga Mindanao leg sa Palarong Pambansa, nga karon pa lamang gisugdan na ang pagplano, isip kabahin sa pagpalambo sa sports tourism ug cultural tourism sa Bukidnon.

Sa ngalan sa katawhan sa Bukidnon, kinasingkasing nga gidawat ug gipasalamatan ni Gobernador Rogelio Neil P. Roque ang maong proyekto gikan sa opisina ni Senador Zubiri.

Ang pasilidad magpalig-on sa kahanduman sa lalawigan sa pagdawat sa mga atleta gikan sa tibuok rehiyon alang sa nagsingabot nga Northern Mindanao Regional Athletic Association (NMRAA) 2026.

Sa pakigpulong ni Malaybalay City Mayor Jay Warren Pabillaran, iyang giila ang dakong tabang sa Aquatic Center sa pagpalambo sa talento ug kahusayan sa mga atletang Bukidnon. (melbmadera)