Ang Valencia City, Bukidnon, nakatala og 19 ka kaso sa HIV/AIDS niadtong 2025 ug sa unang halos lima ka bulan ning kasamtangang tuig, misaka na usab ngadto sa 18 ang bag-ong natala
nga mga kaso

Gibutyag kini ni City Health Officer (CHO) Atty. Michael Escalante atol sa Kapehan sa
Valencia City Press Corps (VCPC) nga gihimo sa Conference Room sa City Mayor’s Office sa
City Hall niadtong hapon sa Mayo 18, 2026.
Sa sinugdanan sa press conference, wala dayon ibutyag ni Escalante ang gidaghanon sa mga
kaso bisan pa sa kabalaka sa pipila ka media practitioners mahitungod sa posibleng pagsaka sa
ihap sa mga nataptan sa maong sakit.
Matud niya, wala ginatago sa lokal nga panggamhanan ang datos kalabot sa HIV/AIDS apan
adunay hustong proseso ug koordinasyon sa wala pa kini ipagawas sa publiko.
Apan sa ulahing bahin sa iyang paghatag og pahayag isip usa sa mga resource persons, nabutyag
ra usab ang maong datos human gipasiugda sa usa ka correspondent sa community newspaper
outlet ang kaimportante sa transparency ug sa pagpakaylap sa impormasyon isip kabahin sa
kampanya batok sa HIV/AIDS.
Gisuportahan usab kini ni Jose M. Galario Jr., nga spokesperson sa City Government sa
Valencia, hinungdan nga nangayo dayon og clearance si Escalante gikan sa opisyal sa
Department of Health (DOH)-Region 10 aron opisyal nga mahatag ang impormasyon.
Unang gibutyag atol sa press conference ang 19 ka kaso nga natala niadtong 2025, samtang ang
18 ka bag-ong kaso ning tuiga personal nang gisulti ni Escalante ngadto sa usa ka news
correspondent human sa maong kalihokan nga nangayo sa datos.
Giklaro usab ni Escalante nga ang pag-ila sa daghang kaso sa siyudad dili lamang pasabot sa
pagsaka sa infections kundili resulta usab sa mas epektibong early detection ug sa padayon nga
kampanya sa lokal nga panggamhanan pinaagi sa mga programa ug serbisyo sa City of Valencia
HIV and AIDS Support House (CV-HASH).
Dugang pa niya, adunay suporta gikan sa DOH, lakip ang paghatag og libreng tambal alang sa
mga out-patients aron masiguro ang padayon nga pag-atiman ug suporta sa mga pasyente.
Samtang kabahin sa kampanya sa pagpataas sa kahibalo ug paglikay sa HIV/AIDS, gibana-bana
nga 2,000 ka mga estudyante sa Grade 11 ug Grade 12 ang ipatawag sa umaabot nga Hunyo
alang sa usa ka lapad nga awareness seminar nga pagahimoon sa City Gym.
Ang maong kalihokan kabahin sa padayong paningkamot sa dakbayan sa pagpalig-on sa
edukasyon, prevention campaign, ug pagwagtang sa stigma kabahin sa HIV/AIDS sa komunidad.
(melbmadera)