Human sa malampusong partisipasyon sa contingent sa Maramag sa bag-ohay lang nga Kaamulan 2026, nagpahigayon og Victory Party ang Local Government Unit sa Maramag aron pasidunggan ug saulogon ang tanang performers, working committees, support staff, partner agencies, ug mga indibidwal nga mipaluyo sa kalampusan sa Maanyag Maramag sa maong
kasaulogan

Sumala sa press release, mapasigarbuhon nga nakaangkon ang Maanyag Maramag contingent sa
titulo isip 1st Runner-Up sa Street Dancing Competition ug Ground Presentation, nga nagdala og
dungog ug garbo sa tibuok munisipyo.
Ang selebrasyon gipangulohan nila Jose Joel P. Doromal, Vice Mayor John Lester Tan-Malack
Tan, Sangguniang Bayan Member Diosdadu L. Seberia, ug Engr. Evelyn Lantong, municipal
administrator ug Kaamulan Supervisor, nga nagpahayag sa ilang lawom nga pasalamat sa tanang
adunay kontribusyon sa maong kalampusan.
Giila sa lokal nga panggamhanan ang dakong papel sa mga performers, propsmen, musikero,
Datu ug Bae, mga chieftain, koreograpo, trainers, ug working committees, nga pinaagi sa ilang
dedikasyon, sakripisyo, talento, ug walay kakapoy nga paningkamot, nahimong malampuson ang
partisipasyon sa Maramag sa Kaamulan 2026.
Ang maong victory party dili lamang selebrasyon sa kadaugan, kondili usa usab ka
pagpasidungog sa panaghiusa, kultura, ug espiritu sa pagtinabangay nga nagpakita sa tinuod nga
garbo ug pagkamaanyag sa katawhan sa Maramag. (melbmadera)