Patay ang usa ka ahente sa real estate human kini gipusil sa usa ka wala mailhing gunman samtang pauli gikan sa usa ka iskedyul sa pagtan-aw og kabtangan sa Purok 7, Barangay South Poblacion, Maramag, Bukidnon, hapon sa Hunyo 5, 2026

Sumala sa report sa kapolisan, ang biktima usa ka hingkod nga lalaki ug residente usab sa maong barangay.

Sa inisyal nga imbestigasyon, nasayran nga samtang mosakay na unta ang biktima sa iyang sakyanan uban sa iyang babayeng kauban nga usa usab ka real estate agent, kalit nga miduol ang usa ka wala mailhing suspek ug gipusil siya sa dapit sa wala nga dunggan.

Human sa pagpamusil, daling misakay ang gunman sa usa ka motorsiklo diin nagpaabot ang iyang kaubang suspek. Dayon silang mipadulong paingon sa amihanang bahin sa maong lugar.

Gihatagan dayon og tabang ang biktima ug gidala sa Bukidnon Provincial Hospital–Maramag alang sa pagtambal. Apan gideklarar kini nga dead on arrival sa nag-atiman nga mananambal tungod sa grabeng samad nga iyang naangkon.

Padayon ang imbestigasyon sa kapolisan aron mailhan ug madakpan ang mga suspek, ingon man matino ang motibo sa maong krimen. (melbmadera)