Nasikop sa hiniusang puwersa sa kapolisan ang Top 1 Most Wanted Person (MWP) sa probinsya atol sa operasyon nga gipahigayon gabii sa Hunyo 8, 2026, sa Purok 2, Barangay Libertad, Quezon, Bukidnon

Sumala sa report sa kapolisan, ang nadakpan nailhang si Kristian Padayogdog Aragon, 20 anyos, ulitawo, mag-uuma, ug residente sa Purok 4, Barangay San Isidro, Quezon, Bukidnon.

Gidakop siya pinasubay sa Warrant of Arrest nga gipagawas batok kaniya alang sa mga kasong Statutory Rape ubos sa Article 266-A sa Revised Penal Code nga giamendar sa Republic Act No. 11648, ug Sexual Assault, nga gi-docket ubos sa Criminal Case Nos. 48321-26, 48322-26, 48323-26, 48324-26, ug 48325-26.

Base sa mando sa korte nga napetsahan Mayo 18, 2026, walay piyansa nga girekomendar alang sa tulo ka ihap sa kasong Statutory Rape, samtang gitakda ang piyansa nga P90,000 matag usa alang sa duha ka ihap sa kasong Sexual Assault.

Ang maong operasyon kabahin sa padayon nga kampanya sa kapolisan batok sa mga wanted persons aron mapalig-on ang pagpatuman sa balaod ug paghatag og hustisya sa mga biktima.

Sa pagkakaron, anaa na sa kustodiya sa Quezon Municipal Police Station ang dinakpan alang sa hustong dokumentasyon ug disposisyon sa kaso. (melbmadera)