Nasikop sa hiniusang pwersa sa kapolisan ug mga operatiba kontra ilegal nga droga ang Top 1
High Value Individual (HVI) sa lebel sa probinsya sa Bukidnon atol sa usa ka buy-bust operation
nga gihimo sa Purok 14, Barangay Laligan, Valencia City, gabii sa Hunyo 12, 2026

Ang nadakpan mao ang 37-anyos nga lalaki nga nailhan sa alyas nga “Raffy,” nga giila isip
PNP-PDEA Provincial Target Top 1 HVI sa Bukidnon. Atol sa operasyon, narekober gikan sa
suspek ang gipalit ug uban pang mga pakete sa gidudahang shabu nga adunay kinatibuk-ang
gibug-aton nga 6.1 gramos ug gibanabanaang standard drug price nga P41,480.
Human sa operasyon, gidala ang suspek uban sa tanang nakumpiskang ebidensya ngadto sa
Valencia City Police Station alang sa hustong dokumentasyon ug pagproseso. Samtang, ang mga
narekober nga ilegal nga droga itugyan sa Bukidnon Provincial Forensic Unit aron sumailalom
sa qualitative ug quantitative examination.
Giandam na sa mga awtoridad ang pagsaka og kaso batok sa suspek tungod sa giingong paglapas
sa Republic Act 9165 o ang Comprehensive Dangerous Drugs Act of 2002, nga isumite alang sa
inquest proceedings.

Ang operasyon gipahigayon sa hiniusang pwersa sa Valencia City Police Station (VCPS) ubos sa
pagpangulo ni Lt. Col. Bryan M. Panganiban, kauban ang mga sakop sa Bukidnon 2nd
Provincial Mobile Force Company, 1003rd Maneuver Company, Regional Mobile Force
Battalion 10, ug PDEU-Bukidnon, sa koordinasyon sa Bukidnon Provincial Intelligence Unit.
(melbmadera)