Patay ang duha ka lalaki human gipamusil samtang nagsakay og motorsiklo padulong sa ilang
panimalay sa Sitio Bahucanon, Barangay Cabadiangan, Kadingilan, Bukidnon niadtong Agosto
15.

Sumala sa report ni Police Major Guy R. Pacamo, officer in-charge sa Kadingilan Municipal
Police Station, nahitabo ang pagpamusil pasado alas 7 sa buntag, diin nakadawat sila og tawag
gikan sa isa ka concerned citizen mahitungod sa insidente.
Pag-abot sa mga responding personnel sa lugar, nakit-an ang duha ka biktima nga walay
kinabuhi ug naghigda sa daplin sa dalan. Nakumpirma sa inisyal nga imbestigasyon nga ang
duha nakaangkon og mga samad pinusilan sa nagkalain-laing bahin sa lawas, nga hinungdan sa
ilang kamatayon.
Gideklarar silang patay sa attending physician gikan sa Municipal Health Office sa Kadingilan.
Ang mga biktima, nga 57 ug 60 anyos, mga residente sa Barangay Cabadiangan ug giingong
pauli na aron pakan-on ang ilang mga hayop sa dihang nahitabo ang pagpamusil.
Sumala sa imbestigasyon, samtang nagmotor ang duha ug nagbaktas sa maong dalan, gi-ambush
sila sa mga suspek ug gipusil.
Isa ka testigo nga nagbiyahe usab padulong sa Sitio Bahucanon miingon nga nakadungog siya og
mga buto sa armas. Sa iyang pagtan-aw sa direksyon sa buto, nakita niya ang duha ka tawo nga
nagsakay sa itom nga Bajaj motorcycle, diin ang back rider giingong adunay dala nga armas.

Human sa pagpamusil, nakita sa testigo nga mikalagiw ang mga suspek sakay sa motorsiklo
padulong sa Barangay Macabenban, Carmen, Cotabato.
Base sa pahayag sa testigo, giila sa kapolisan ang mga suspek nga duha ka lalaki, 40 ug 22
anyos. Apan, nagpabilin silang at large hangtod sa pinakabag-ong report.
Gidala na sa ilang pamilya ang mga lawas sa duha ka biktima ngadto sa Villanueva Funeral
Home.
Padayon ang imbestigasyon sa Kadingilan MPS ug gipaabot pa ang pagproseso ug forensic
examination sa crime scene sa Provincial Forensic Unit. Sa inisyal nga imbestigasyon, posibleng
personal nga panagbangi ang motibo sa pagpamusil.
Nagpadayon usab ang hot pursuit operation sa kapolisan ug nakigkoordinar sa Carmen MPS
alang sa posibleng pagkadakop sa mga suspek. (melbmadera)