Giideklarar isip drug-cleared ang Barangay Lilingayon ug Barangay Sinayawan sa Valencia City, Bukidnon, atol sa 4th Regional Oversight Committee on Barangay Drug Clearing Calendar Year 2025 kaniadtong Oktubre 3, 2025, sa DOH Conference Room, DOH Regional Office 10, Brgy. Carmen, Cagayan de Oro City

Sumala sa social media post sa City Government of Valencia, nakab-ot ang milestone ang Barangay Lilingayon ubos sa liderato ni Punong Barangay Rey Bonilla, ug ang Barangay Sinayawan ubos sa liderato ni Punong Barangay Jobert Alupani, tungod sa ilang kakugi sa pagpanguna sa mga inisyatiba batok sa ilegal nga droga, uban ang suporta sa barangay councils ug komunidad.

Ang deklarasyon napalig-on pinaagi sa panaghiusa sa lokal nga pangagamhanan sa pagpangulo ni Mayor Amie Galario, suporta sa 10th Sangguniang Panlungsod sa pagpangulo ni Vice Mayor Greizl Galario-Fernandez, ug giya sa Anti-Illegal Drugs and Substance Abuse Division (AIDSAD) Team nga gipangulohan ni Mr. Giovanni Asis, CADAC Coordinator.

Gawas sa duha ka bag-ong barangay, napasaran usab ang revalidation sa 11 ka barangay sa dakbayan, nga nagpabilin sa ilang status isip drug-cleared. Kini mao ang Colonia, Mailag, Concepcion, Kahaponan, Sinabuagan, Maapag, Nabag-o, Tugaya, Lourdes, Mt. Nebo, ug San Isidro.

Nagpasalamat ang LGU Valencia City sa suporta sa DILG Valencia ubos ni Mr. Jan Eric Manasan, sa PDEA Bukidnon, labi na kang IA Nicanor Luchana Jr., ug sa uban pang mga opisina nga misalmot sa kalihokan, lakip ang City Health Office ug Valencia City Police Station.

Mahimong ideklarar nga drug-cleared ang usa ka barangay kung kini nakatuman sa tanang rekisitos sa Barangay Drug-Clearing Program, lakip ang pagkawala sa mga identified drug personalities, pag-disband sa drug dens o laboratories, implementasyon sa aftercare ug reintegration programs para sa mga drug reformists, ug aktibong suporta sa komunidad batok sa ilegal nga droga.. (melbmadera)