Gipasiugda sa Provincial Governance for Climate and Disaster Resilience (Gov-CDR) Scoping Team ang Focus Group Discussion (FGD) kauban ang Bayanihan Millennium Multi-purpose Cooperative

Sumala sa social media post sa Provincial Government of Bukidnon, kini kabahin sa scoping processes alang sa Climate Risk Assessment and Profiling of Arabica Coffee Livelihoods sa Bukidnon.

Natigayon ang kalihokan kaniadtong Oktubre 7, 2025, sa Barangay Pigtauranan, Pangantucan, Bukidnon.

Gipasabot ni Dr. Jose Hermis P. Patricio, team leader sa Provincial Gov-CDR Scoping Team, nga ang FGD mahimong basihan sa assessment proper nga isumite sa Alinea Phil. Inc.

Ang Alinea Phil. Inc., sa pakigtimbayayong sa Global Affairs Canada, nagpasayon sa Gov-CDR Project aron mapalig-on ang kapasidad sa lokal nga mga kagamhanan sa pagplano, pagpondo, ug pagpatuman sa mga estratehiya alang sa disaster preparedness, response, ug recovery.

Kini usab kabahin sa Bukidnon Coffee Development Project ni Governor Rogelio Neil O’Neil Roque, nga nagtumong sa malangkubon ug evidence-based nga pagdumala sa climate ug disaster resilience. (melbmadera)