Ang probinsya sa Bukidnon opisyal nga mag-host sa Northern Mindanao Regional Athletic Association (NMRAA) Regional Meet 2026

Kini sumala sa press release sa Provincial Government of Bukidnon (PGB) pinaagi sa Public Affairs, Information and Assistance Division nga gipatik sa opisyal nga Facebook page sa probinsya.

Subay niini, mipagawas si Gobernador Rogelio Neil P. Roque og Executive Order No. 70, series of 2025, niadtong miaging bulan aron palig-onon ang mga preparasyon alang sa maong kalihokan.

Tumong sa maong executive order ang pagtukod sa Technical Working Group (TWG), mga komite, ug secretariat, lakip ang klarong paglatid sa ilang tagsa-tagsa ka buluhaton alang sa hapsay nga pagdumala sa NMRAA Regional Meet sa probinsya.

Gipasiugda sa PGB ang suporta sa mga programa ug kalihokan nga may kalabutan sa sports isip mahinungdanong aspeto sa pag-uswag sa kabatan-onan, nga mosuporta usab sa pagpalambo sa kalidad sa edukasyon, pisikal nga kahimsog, ug kinatibuk-ang kalamboan sa mga estudyante.

Alang sa pinansyal nga suporta, ang pondo sa pag-host kuhaon gikan sa Special Education Fund (SEF) sa PGB, kauban ang kontribusyon sa SEF sa mga city ug municipal local government units (LGUs) sa Bukidnon, subay sa availability sa pondo ug sa kasamtangang mga regulasyon sa accounting ug auditing.

Ang NMRAA mao ang opisyal nga sports organization sa Department of Education (DepEd) sa rehiyon ug nagsilbi usab nga qualifying stage sa mga student-athletes nga magrepresentar sa Northern Mindanao sa Palarong Pambansa. (melbmadera)